"Nyesui banggan"

(Bagian 2)

Kik radu muli ngulang rasan mit lamban ni,mit hulun tuha ni, adu muneh ngena restu jak ina bapak ni muli, meranai kanah ngicik jama hulun tuha ni di lamban ngilu kesusuian banggan.

Reramah ni hulun tuha ni pihak meranai ngayun pepuwarian ni, dacok goh pak balak,pak lunik atau mamak ni meranai sai jelas lagi meredik nihan kemuwarian ni mit di lamban ni muli, nunggai keluarga ni muli, sai inti ni nyaheh kon kelajuan ni guwai,niat ni muli tian rua meranai sino.

Biasa ni pas nyesui banggan ji juga, adu mulai betetanya di antara rua belah pihak keluarga ni muli rik utusan keluarga ni meranai, terutama ngicik kon aga repa bunyi ni, apikah semanda  atau jujor ( mani kik jaman tumbai angkah wat semanda rik jujor gawah di lom pernikahan adat lampung, mawat gegoh tano sai wat muneh istilah ni kawin riya, mak ngedok bunyi), kadu juga ngicik kon api-api pengilu ni muli haguk meranai, rik lamon muneh kicik an sai bareh,termasuk juga aga repa balak ni du'a ni kanah, aga api sai ti tikol kak dinana sa, rik sai bareh-bareh.

Kindang, sinji muneh da kelemahan ni kik hulun tuha ni meranai sa ngutus kon keminak muwarian sai nyesui banggan, mawat dacok putus langsung api- api sai di kicik kon kerua belah pihak, ulih tantu ni sai memena kik gelar ni ngirim utusan, ya angkah nyampai kon niat, nyampaikon  kicik an, keputusan tetap jama ulun tuha ni sai besangkutan. Biasa ni nangon sai di utus ano adu langsung nangguh, aga ti kicik kon pai jama ulun tuha ni meranai, kanah rua atau telu rani lagi tian muloh luwot ngeni pandai repa da keputusan helau ni.

Mulang jak lamban ni muli no kanah, utusan nyesui banggan ji, tentu ni langsung bucerita jama hulun tuha ni meranai, api- api sai tikicik kon di lamban ni muli, api api cinta kehaga ni muli, rik api aga bunyi ni guwai sino.



Salam : Elly Dharmawanti

                                        " ngulang rasan, ngulang banggan"

Ngulang rasan ngulang banggan, hinji langkah awal sai dilaksankon kik aga ngajong, biasa ni ngulang rasan ngulang banggan ji jak pihak muli, di dipa di saat seno muli ngulangkon rasan ni, mit lamban jama ina bapak ni daleh ngejelaskon maksut keratongan ni meranai sino ngehadap hulun tuha ni muli.

Ulih kik jaman tumbai, mawat hak gegoh tano ji, merani napol muli ti kuruk kon di lom lamban,mejong di ruang tamu adu tikenal kon jama ina bapak rik puwari jak kanjak mehayu, kik pak ujung nikanah rasan mak jadi.

Kik jaman tumbai sa, muli sa mak kuk kuwawa aga netai tangrambah lamban ni rasan ni, reno juga kuk meranai, mani tumbai sa masih nyancan sai gelar ni "setekutan" jadi ni kik muli meranai di aga ngicik (istilah sanakntano ji ngapel) ya jak tuku ni dapor mit tuku ni dapok, muli di lom dapor lamban tian, meranai ni jak luwar dapor (maklumlah jaman tumbai sa, reramah lamban lagi papan unyik,nkik mak resi pering, jagi wat juga celah ni lubang cutik pakai ngesesenuk pudak)

Teuloh luwot di kicik an ngulang rasan ngulang banggan no jino, kik meranai adu sehadapan jama ina bapak ni muli, pastilah lamon pertanyaan jak pihak ni ina bapak muli haguk meranai seno, mulai jak gelah, umor, asal usul, wat kemuwarian jama sapa-sapa gawoh rik sai bareh-bareh ( kurasa gegoh ria pertanyaan ni mak sejejawohan jak bebet bibit bobot sa juga kik hani sanak tano ji)

Radu jak seno, ulun tuha ni muli awat da kik hak langsung setuju nge iya kon rasan sai di ulang kon anak ni ano, kintu aga nunggu pai mesaka, ulih biasa ni ulun tuha ni muli lamon pertimbangan, lamon butanya lawan keminak muwarian ni meranai no sai bareh (nyelidik dija dudi).

Kik adu di rasa hulun tuha ni muli adu sedong do meranai seno jama anak ni, ampai da anak muli ni di kayun ngulang kon meranai sino luwot, ngulangkon banggan, dacok di artikon ulun tuha ni muli adu setuju rik ngerestui. (Bagian 1)


Salam : Elly Dharmawanti

                                                 "Awal muwak ni cawa"

Tabik pun....


Melalui blog pribadiku sinji, nyak haga bucerita cutik rik berbagi juga cutik, mengenai tahapan- tahapan sai wajib ti guwaikon di lom prosesi pernikahan masyarakat pesisir barat umum ni.

Ngilu maaf semekungni, kintu bang kintu nihan dilom penyampaian ku ji mak sekena an di hati,nyak kilu bimbing kilu tawit jama puwari sunyin ni.

Niat hati ku, mak ngedok jak bareh selain haga ngelestarikon budaya sai wat di masyarakat ram di pesiser barat ji, budaya sai helau, sai di jaman teknologi serba canggih ji adu reramah di lupakon hulun.(kekalau seterimaan puwari)

Nyak aga mulai bucerita jak muwak ni "ngulang banggan" sampai "buasasaran" kindang mak kik dacok kik aga kuguwaikon sekali gus, kintu aga kutulis pelelegohan gawoh, kekalau sampai juga hehehe




Salam :Elly dharmawan